Në Gjykatën Themelore në Prishtinë ka nisur shqyrtimi gjyqësor për rastin e sulmit me eksploziv ndaj kanalit të Ibër-Lepencit, ngjarje e ndodhur më 29 nëntor 2024 në fshatin Varagë të Zubin-Potokut. Të pandehurit Dragisha Viqentijeviq, Jovan Viqentijeviq dhe Igor Dimoviq (ky i fundit po mbrohet në liri) kanë mohuar akuzat e ngritura nga Prokuroria Speciale e Republikës së Kosovës.
Sipas aktakuzës së prokurorit special Bekim Kodraliu, vëllezërit Viqentijeviq, në bashkëpunim me persona të tjerë të paidentifikuar, kanë vendosur rreth 20 kilogramë eksploziv të llojit TNT (trinitrotoluene) në një shtyllë betoni të kanalit. Prokuroria pretendon se veprimi u ndërmor me qëllim të frikësimit serioz të popullsisë, cenimit të rendit kushtetues dhe sigurisë së vendit.
Hetimet konstatojnë se eksplozivi ishte vendosur në një çantë të lidhur me litar dhe u aktivizua përmes një fitili me djegie të ngadalshme. Shpërthimi shkaktoi dëme të konsiderueshme në strukturën e betonit, duke ndërprerë furnizimin me ujë dhe duke dëmtuar infrastrukturën kritike që shërben për nevojat e Korporatës Energjetike të Kosovës (KEK) për prodhimin e energjisë elektrike.
Gjatë seancës, të tre të akuzuarit kanë deklaruar para gjykatës se nuk ndihen fajtorë për veprat penale që u vihen në barrë.