Në Gjykatën Themelore në Prishtinë, nën drejtimin e gjykatësit Vesel Ismajli, ka nisur shqyrtimi gjyqësor për rastin e sulmit në kanalin e Ibër-Lepencit në Varagë të Zubin Potokut. Tre të pandehurit, Jovan Viqentijeviq, Dragisha Viqentijeviq dhe Igor Dimoviq, janë deklaruar të pafajshëm për akuzat që rëndojnë mbi ta, pavarësisht pretendimeve të Prokurorisë Speciale se ata janë përgjegjës për shpërthimin e ndodhur më 29 nëntor 2024.
Prokurori i rastit, Bekim Kodraliu, theksoi se sulmi nuk ishte një rast i izoluar, por pjesë e një serie veprimesh të organizuara kundër rendit juridik dhe sigurisë së Kosovës. Sipas aktakuzës, sulmi kishte për qëllim dëmtimin e infrastrukturës jetike për furnizimin me ujë dhe energji elektrike. Prokuroria Speciale ka siguruar prova materiale të mbështetura nga ekspertiza e FBI-së dhe policisë italiane, të cilat lidhin të pandehurit me vendin e ngjarjes, duke përfshirë analiza të dheut nga çizmet e sekuestruara që përputhen me ato të marra pranë kanalit.
Provat e sekuestruara
Gjatë kontrolleve në banesat e të akuzuarve, autoritetet kanë sekuestruar një arsenal armatimi, duke përfshirë:
• Municion dhe granata dore;
• Raketahedhës (zolla);
• Radio-lidhje dhe uniforma ushtarake;
• Pajisje elektronike.
Përveç akuzave për sulm terrorist dhe shkatërrim të pajisjeve publike, ndaj Jovan Viqentijeviq rëndon edhe akuza për veprën penale të spiunazhit. Sipas prokurorit Kodraliu, ekspertiza e pajisjeve të sekuestruara elektronike, përfshirë kompjuterin dhe telefonin, ka nxjerrë në pah dokumente konfidenciale të KFOR-it dhe komunikime të tjera që dëshmojnë aktivitet të dyshimtë. Prokuroria ka deklaruar se disponon prova të mjaftueshme për të dëshmuar fajësinë e të akuzuarve në vijim të procedurës gjyqësore.
Përditësime
Prokuroria ka ngritur akuza ndaj Qeverisë së Serbisë për rolin e saj në organizimin e sulmit ndaj kanalit të Ibër-Lepencit. Hetimet kanë konfirmuar se trajnimet për sulmin janë kryer në poligonin ushtarak 'Livadhet e Pasulit'. Përmes analizave molekulare të dheut në tri lokacione të ndryshme, ekspertët e FBI-së kanë siguruar prova materiale që lidhin autorët me këto objekte ushtarake.
Prokuroria ka siguruar prova të reja shkencore për sulmin terrorist në kanalin e Ibër-Lepencit. Agjencia e Forenzikës së Kosovës ka identifikuar ADN-në e Jovan Viçentijeviqit në një fitil ndezës me gjatësi 9.2 metra, duke konfirmuar profilin gjenetik përmes 20 nga 24 lokuset e testuara. Këto rezultate janë verifikuar edhe nga Policia Shkencore e Italisë, ndërsa hetimet konfirmojnë se eksplozivi ishte transportuar nga Serbia.