Milva Ekonomi, kryetare e Komisionit Parlamentar të Ekonomisë, deklaroi se të ardhurat për frymë të shqiptarëve projektohen të mbërrijnë rreth 15 mijë euro në 2029, kur Shqipëria të anëtarësohet në Bashkimin Europian.
Sipas saj, ky parashikim rrjedh nga procesi i shndërrimit ligjor ekonomik, i cili konsiderohet i pakthyeshëm. "Nëse unë në vitin 2013 i kisha të ardhurat për frymë rreth 3.340 euro, në vitin 2024 i kisha rreth 10.340 euro, në vitin 2029 duhet t’i çoj 15 mijë euro. Ky është një objektiv që matet, por mund të jetë edhe më shumë, por duhet bërë kjo përpjekje", tha Ekonomi.
Ajo theksoi rolin e fiskalizimit të ekonomisë. "Fiskalizimi e ka mbyllur me tra: do të jesh i punësuar, do të kesh një kontratë, do përfitosh një pagë minimale të deklaruar, sepse do përfitosh edhe sigurimet shëndetësore, edhe ato shoqërore, sipas rregullave që ka shteti", shpjegoi ajo.
Politika e përgjithshme, sidomos në kuadër të bisedimeve për anëtarësimin në BE, vendos qytetarin në qendër, duke synuar rritjen e mirëqenies dhe punën e denjë. "Nga njëra anë, ke rritur mirëqenien, dhe nga ana tjetër, ke bërë që njeriu të ketë punë të denjë dhe të garantuar. Kjo nuk do të ketë më kthim pas. Këto janë gurë që i bëjnë njerëzit të kuptojnë sa e rëndësishme është t’i ruajnë këto të drejta sot", nënvizoi Ekonomi.