Anëtarët e familjes Shkodra, të dyshuar për vrasjen trefishtë në Gjilan, vazhdojnë të jenë në arrati pas 9 muajsh nga ngjarja. Vrasja ndodhi në gusht të vitit të kaluar në një kafene në qytet.
Mefail Shkodra, së bashku me djemtë e tij Edonis Shkodra e Engjull Shkodra, nuk janë kapur ende nga institucionet e drejtësisë. Policia e Kosovës konfirmon se ka ndërmarrë të gjitha veprimet e nevojshme, duke përfshirë lëshimin e fletë-arrestit ndërkombëtar.
"Referuar kërkesës suaj të mëposhtme, ju informojmë se lidhur me rastin Policia e Kosovës ka ndërmarrë të gjitha veprimet e nevojshme, duke përfshirë edhe fletë-arrestin ndërkombëtar. Ndërsa sa i përket çështjes së zyrtarëve policorë, ju lutem të adresoheni te IPK-ja", thuhet në përgjigjen zyrtare të policisë.
Inspektorati Policor i Kosovës konfirmon se katër zyrtarë policorë janë ende të suspenduar me pagesë. Suspendimi vazhdon deri kur të jetë në interes të hetimit penal. Hetuesit e IPK-së kryejnë veprime hetimore në koordinim me prokurorinë kompetente.
Zyrtarët e suspenduar janë:
- Një rreshter policor dhe një hetues nga Njësiti i Hetimeve Rajonale në Gjilan;
- Një rreshter policor, shef i hetimeve në Stacionin Policor të Novobërdës;
- Një zyrtar policor nga Njësia e Reagimit të Shpejtë në Gjilan.