Një incident i rëndë ka ndodhur paraditen e së mërkurës, më 29 korrik, në fshatin Pantinë të Vushtrrisë, ku një ekip i Kompanisë Rajonale të Ujësjellësit (KRU) Mitrovica është përballur me të shtëna me armë zjarri gjatë kryerjes së detyrës. Tre punonjësit, të moshave 35, 50 dhe 61 vjeç, kishin shkuar në terren për të realizuar shkyçjen e një konsumatori nga rrjeti i ujësjellësit për shkak të mospagesës së faturave.
Sipas deklaratës së kryeshefit të KRU Mitrovica, Bashkim Kurti, incidenti ndodhi ndërsa punonjësit po ktheheshin nga detyra. I dyshuari fillimisht u bllokoi rrugën me një automjet tip “pick-up”, nxori një armë zjarri dhe shtiu në drejtim të veturës ku ndodheshin punëtorët. Sipas rrëfimit të tyre, plumbat kanë kaluar në një distancë prej rreth 30 centimetrash mbi kokat e tyre, por fatmirësisht nuk ka pasur të lënduar. Po ashtu, i dyshuari i ka kërcënuar punonjësit me jetë nëse e raportonin ngjarjen në polici.
Zëdhënësi i Prokurorisë së Mitrovicës, Valon Preteni, konfirmoi se i dyshuari për këtë rast është identifikuar si Fitim Shabani, rreth 41 vjeç. Aktualisht, ai ndodhet në arrati dhe është në kërkim nga autoritetet policore. Në lidhje me këtë rast janë iniciuar hetime për disa vepra penale:
- Kanosje
- Përdorim i armës apo mjetit të rrezikshëm
- Mbajtje në pronësi, kontroll apo posedim të paautorizuar të armës
- Sulm ndaj personit zyrtar me mjet
Në vendin e ngjarjes kanë dalë njësitë policore, përfshirë edhe Njësinë për Reagim të Shpejtë, të cilat kanë kryer bastisje në shtëpinë dhe objektet përcjellëse të të dyshuarit, por arma e përdorur nuk është gjetur. KRU Mitrovica ka njoftuar se konsumatori kishte një borxh të akumuluar prej 1 mijë e 380 euro dhe kishte marrë vazhdimisht njoftime e vërejtje për shlyerjen e tij.