Një ngjarje e rëndë ka tronditur qytetin e Aarau-t në Zvicër gjatë orëve të para të mëngjesit të së dielës, kur të shtëna me armë zjarri u regjistruan gjatë një aktiviteti me muzikë elektronike, i njohur si “Aarauer Rave”. Ngjarja ndodhi pranë hipodromit në zonën e Schachen, ku po merrnin pjesë rreth 3,500 persona.
Sipas njoftimit zyrtar të Policisë Kantonale të Aargaut, bilanci i sulmit është një person i vdekur dhe 5 të plagosur rëndë. Autoritetet kanë izoluar zonën përreth hipodromit, pishinës së qytetit dhe fushave sportive për të mundësuar hetimet. Pavarësisht operacionit të gjerë të forcave të rendit, të cilat janë mbështetur edhe nga mjete ndihmëse në terren, autori i sulmit mbetet ende i paidentifikuar dhe në arrati.
Dëshmitarë të pranishëm në vendngjarje përshkruan se dëgjuan të shtëna që fillimisht i ngatërruan me zhurmën e fishekzjarreve. Një prej tyre rrëfeu se u detyrua të fshihej pasi një plumb goditi çatinë e tendës ku ndodhej, ndërsa të tjerë raportuan se panë një person të armatosur me një pushkë automatike, i cili u largua drejt një zone të pyllëzuar pranë automjeteve të parkuara.
Policia u ka bërë thirrje qytetarëve që të shmangin zonën dhe ka kërkuar nga dëshmitarët që të dorëzojnë çdo fotografi ose video-material që mund të ndihmojë në zbardhjen e dinamikës së sulmit. Deri në këto çaste, motivi i ngjarjes mbetet i paqartë, ndërsa hetimet vijojnë për të zbardhur rrethanat e plota të këtij sulmi.
Përditësime
Autoritetet zvicerane njoftuan arrestimin e një 43-vjeçari zviceran si autorin e dyshuar të sulmit. Viktima që humbi jetën është identifikuar si një 22-vjeçare. Kryeministrja italiane, Giorgia Meloni, konfirmoi se dy nga të plagosurit janë shtetas italianë. Të plagosurit e tjerë janë të moshës 24 deri në 27 vjeç.
Autoritetet kanë identifikuar viktimën e të shtënave në Aarau si 22-vjeçarja italiane, Maria Spinelli. Policia arrestoi të dyshuarin rreth orës 01:00 të së hënës, pas një operacioni 24-orësh kërkimi. Hetuesit njoftuan se i dyshuari mendohet se ka vepruar i vetëm. Gjithashtu, autoritetet specifikuan bilancin e të plagosurve, ku katër burra dhe një grua ndodhen nën kujdesin mjekësor.
Dëshmitarët okularë konfirmuan se të shtënat ndodhën rreth orës 02:30 të mëngjesit të së dielës, vetëm pak minuta pasi muzika në festë u ndërpre. Një dëshmitar raportoi se pati kontakt të drejtpërdrejtë me një prej viktimave të plagosura përpara se të arrinte të fshihej nga sulmuesi. Ndërkohë, Ministria e Jashtme e Italisë dërgoi përfaqësues zyrtarë në Aarau për të monitoruar nga afër situatën dhe për t'i ofruar mbështetje familjes së Maria Spinelli-t.