Të paktën dy persona u plagosën pas të shtënave me armë zjarri në ndërtesën Constant Hall të Old Dominion University-së në Norfolk të shtetit të Virxhinias të SHBA-së, mëngjesin e së enjtes.
Të shtënat u dëgjuan pak para orës 10:50 sipas kohës lokale. Autori i dyshuar u neutralizua nga autoritetet, të cilat konfirmuan vdekjen e tij.
Të plagosurit u transportuan në një spital lokal, por gjendja e tyre shëndetësore nuk është bërë e ditur ende. Policia e universitetit, policia e Norfolk-ut dhe ekipet e emergjencës reaguan menjëherë në vendngjarje. Gjithashtu mbërritën agjentë të Bureau of Alcohol, Tobacco, Firearms and Explosives (ATF), agjencia federale amerikane për çështjet e armëve.
Universiteti, që ka rreth 24 mijë studentë, anuloi të gjitha mësimet dhe aktivitetet në kampusin kryesor për pjesën e mbetur të ditës. Autoritetet u bënë thirrje studentëve dhe stafit të shmangin zonën brenda dhe përreth Constant Hall-it, ku ekipet e emergjencës vazhdojnë punën dhe hetimet.
Përditësime
Policia e Norfolkut konfirmoi një viktimë të vdekur, përveç autorit të neutralizuar.
Zhvillime të tjera:
- Dy të plagosurit janë në gjendje të qëndrueshme.
- Autoritetet aktivizuan alarmin për sulmues aktiv dhe urdhëruan strehohu në vend.
- Mësimet pezullohen edhe për të premten.
- Policia e Norfolkut drejton hetimet.