Prokurori i Përgjithshëm i Teksasit, Ken Paxton, ka ngritur të hënën një padi kundër Netflix-it në gjykatën shtetërore pranë Dallasit. Padia akuzon kompaninë për mbledhje të dhënave personale të përdoruesve, përfshirë fëmijët, pa pëlqimin e tyre dhe për përdorim të dizajnit që krijon varësi te shikuesit.
Sipas dokumentit gjyqësor, Netflix-i ka regjistruar miliarda ngjarje teknike, si klikimet dhe kohëzgjatja e qëndrimit në platformë, për të fituar para nga këto të dhëna. Kompania pretendonte se nuk mbledh apo monetizon të dhënat, siç ka deklaruar ish-drejtuesi Reed Hastings në vitet 2019 dhe 2020. Megjithatë, autoritetet thonë se Netflix-i i ka shitur këto informacione ndërmjetësuesve të të dhënave dhe kompanive të reklamimit.
Padia përmend mekanizma manipulues, si nisja automatike e përmbajtjes (autoplay), që mbajnë përdoruesit të lidhur pas ekranit. Prokuroria argumenton se qëllimi është të mbajë fëmijët dhe familjet të ngjitur, për të mbledhur dhe monetizuar të dhënat. Në dokument thuhet: "Kur shikoni Netflix, Netflix ju shikon."
Netflix-i ka hedhur poshtë pretendimet. Një zëdhënës i kompanisë deklaroi se padi nuk ka bazë dhe mbështetet në informacione të pasakta. Kompania shton se merr seriozisht privatësinë e anëtarëve dhe zbaton ligjet për mbrojtjen e të dhënave kudo që operon. Netflix-i, me seli në Los Gatos të Kalifornisë, do t'i kundërshtojë akuzat në gjykatë.
Akuzat bien ndesh me ligjin e Teksasit për praktikat mashtruese tregtare. Prokuroria kërkon fshirjen e të dhënave të mbledhura në mënyrë të paligjshme dhe ndalimin e përdorimit të tyre për reklama të personalizuara pa pëlqim.