Qyteti i Vlorës po përballet me temperatura tejet të larta gjatë ditëve të para të muajit gusht, duke regjistruar vlera deri në 41 gradë Celsius. Në këto kushte, Shërbimi Zjarrfikës i Bashkisë Vlorë ka vendosur të dalë në terren për të ofruar një lehtësim të përkohshëm për qytetarët dhe pushuesit që ndodhen në qytet.
Mesditën e kësaj të hëne, një automjet zjarrfikës zhvilloi një aksion në zonën e njohur si Skela. Gjatë kësaj ndërhyrjeje, zjarrfikësit spërkatën ujë në ajër për disa minuta, duke krijuar një freski artificiale për të pranishmit në hapësirat publike. Ky veprim u prit pozitivisht nga qytetarët dhe pushuesit, të cilët po përpiqen të përballojnë motin e nxehtë të këtyre ditëve.
Në veçanti, nisma është vlerësuar nga të pranishmit, ku fëmijët kanë qenë ndër më të angazhuarit në këtë përvojë freskuese mes temperaturave përvëluese që kanë përfshirë zonën bregdetare. Aksioni i zjarrfikësve përfaqëson një masë mbështetëse për banorët dhe vizitorët që po kalojnë pushimet në qytetin bregdetar gjatë kësaj vale të nxehti.