Ministria e Shëndetësisë dhe Mirëqenies Sociale (MSHMS) njoftoi se shtatë persona kanë kërkuar ndihmë mjekësore si pasojë e përplasjeve të ndodhura gjatë protestës së sotme përpara Kuvendit. Sipas autoriteteve, të lënduarit ndodhen nën kujdesin e ekipeve mjekësore dhe janë jashtë rrezikut për jetën, ndërsa po vijojnë ekzaminimet e nevojshme.
Sipas të dhënave zyrtare, shpërndarja e pacientëve në strukturat shëndetësore është si vijon:
• Në Spitalin Universitar të Traumës: po trajtohen 2 efektivë policie dhe 2 protestues.
• Në Qendrën Spitalore Universitare “Nënë Tereza” (QSUT): po trajtohen 1 efektiv policie dhe 2 protestues.
Protesta nisi rreth orës 09:20, përpara fillimit të seancës plenare. Gjatë grumbullimit, situata u përshkallëzua me tensione dhe përplasje fizike midis protestuesve dhe forcave të rendit. Raportohet se një grup protestuesish kanë hedhur vezë dhe shishe uji në drejtim të deputetëve që hynin në godinën e institucionit, si dhe ndaj mjeteve të tyre.
Përditësime
Policia e Shtetit konfirmoi se bilanci i të lënduarve nga protestat para Kuvendit ka shkuar në 19 persona, nga të cilët 15 janë efektivë policie dhe 4 protestues. Aktualisht, 4 efektivë po marrin trajtim spitalor, ndërsa të tjerët janë larguar. Në kuadër të hetimeve për përplasjet, janë shoqëruar 18 shtetas. Protesta ka bllokuar hyrjet e Kuvendit, duke pamundësuar daljen e deputetëve pas përfundimit të seancës plenare.