Situata në Rrjoll të Velipojës është tensionuar pasditen e sotme, ku banorët kanë protestuar kundër projektit të një resorti turistik, i cili shtrihet në një sipërfaqe prej 147 hektarësh dhe është në pronësi të biznesmenit Bashkim Ulaj. Protestuesit kanë kundërshtuar rrethimin e zonës me mure dhe tela me gjemba, duke tentuar të bllokojnë makineritë e rënda që operojnë prej muajit shkurt.
Banorët pretendojnë se tokat e tyre janë përvetësuar përmes dokumenteve të falsifikuara dhe theksojnë se çështja e pronësisë është ende në procese gjyqësore. Me pankarta ku shkruhej "Jemi fëmijët e Rrjollit, toka nuk preket!", ata shprehën revoltën e tyre ndaj ndërhyrjes në zonë.
Gjatë protestës, qytetarët u përplasën me forcat e Policisë së Shtetit, të cilat kishin vendosur një perimetër sigurie për të mbrojtur kantierin. Pas përpjekjeve për të këshilluar turmën, policia u tërhoq, duke i lejuar banorët të hyjnë në hapësirën e kantierit pas rrëzimit të pjesëve të rrethimit metalik.
Protestuesit kanë lëshuar gjithashtu thirrje kundër klasës politike, duke bërtitur në kor: "Rama në burg, Berisha në burg".