SHBA dhe Irani vazhdojnë të shkëmbejnë akuza për tensionet në Gjirin Persik, ndërsa Uashingtoni pret përgjigjen e Teheranit ndaj propozimit të fundit për t’i dhënë fund luftës mes tyre. Kjo ndodh në kohën kur përpjekjet për armëpushim shoqërohen me incidente të reja ushtarake në dhe rreth Ngushticës së Hormuzit.
Zyrtarë të lartë amerikanë, nga presidenti Donald Trump deri te sekretari i Shtetit Marco Rubio, thanë më 8 maj se përgjigjja pritej brenda pak orësh. Rubio, gjatë një vizite në Romë, u shpreh se "shpreson që të jetë një ofertë serioze". Trump e mbështeti në komente për CNN, duke thënë se "supozohet se do të dëgjojmë prej tyre sonte".
Deri më 9 maj, Teherani nuk kishte dhënë njoftim zyrtar, veçse një deklaratë ku vuri në dyshim seriozitetin e SHBA-së. Ministri i Jashtëm iranian Abbas Araqchi, në bisedë telefonike me homologun turk Hakan Fidan, tha se "përshkallëzimi i fundit i tensioneve nga forcat amerikane në Gjirin Persik dhe veprimet e shumta të tyre në shkelje të armëpushimit kanë shtuar dyshimet për motivimin dhe seriozitetin e palës amerikane në rrugën e diplomacisë". Kjo u publikua nga agjencia gjysmëzyrtare ISNA.
Rubio mbrojti fuqishëm veprimet e fundit ushtarake amerikane dhe hodhi poshtë përpjekjet iraniane për të rregulluar lundrimin në Ngushticën e Hormuzit, rrugë strategjike detare përmes së cilës kalon rreth një e pesta e furnizimeve globale me naftë dhe gaz. "Irani tani pretendon se zotëron, se ka të drejtë të kontrollojë, një rrugë ujore ndërkombëtare... Kjo është një gjë e papranueshme që ata po përpiqen ta normalizojnë", tha ai.