Një tërmet me magnitudë rreth 4.8 ballë sipas shkallës Richter goditi zonën Prizren–Shtërpcë në Kosovë mbrëmjen e së martës, rreth orës 22:05 me orën lokale. Lëkundjet u ndjenë në pjesë të ndryshme të Kosovës dhe rajonit.
Ministria e Mjedisit, Planifikimit Hapësinor dhe Infrastrukturës doli me një njoftim për qytetarët, duke apeluar për qetësi dhe respektim të udhëzimeve të sigurisë.
Udhëzimet gjatë tërmetit
Ministria këshillon qytetarët të ruajnë qetësinë dhe të mos panikosen. Rekomandimet përfshijnë:
- Të futen menjëherë nën një tavolinë të fortë ose pranë një muri mbajtës.
- Të mbrojnë kokën dhe qafën me duar.
- Të qëndrojnë larg dritareve, rafteve dhe objekteve që mund të bien.
- Të mos përdorin ashensorin.
- Nëse ndodhen jashtë, të qëndrojnë larg ndërtesave, shtyllave elektrike dhe pemëve.
- Nëse vozisin, të ndalin në një vend të sigurt dhe të qëndrojnë brenda automjetit derisa të përfundojnë lëkundjet.
Udhëzimet pas tërmetit
Pas lëkundjeve, ministria këshillon:
- Të dalin me kujdes nga objekti vetëm nëse ai është i dëmtuar.
- Të kontrollojnë për persona të lënduar dhe të njoftojnë shërbimet emergjente nëse është e nevojshme.
- Të ndjekin vetëm njoftimet zyrtare nga institucionet përkatëse.
- Të jenë të përgatitur për lëkundje pasuese.
"Siguria fillon me vetëdije dhe veprim të shpejtë. Respektimi i këtyre udhëzimeve ndihmon në zvogëlimin e rrezikut për ju dhe familjen tuaj", thuhet në njoftimin e ministrisë.