Një tërmet me magnitudë rreth 4.8 sipas shkallës Rihter goditi zonën Prizren–Shtërpcë në Kosovë mbrëmjen e së martës, rreth orës 22:05 me orën lokale. Lëkundjet u ndjenë në pjesë të ndryshme të Kosovës dhe rajonit.
Në Qendrën e Skijimit në Brezovicë, menaxheri Ardian Grazhda deklaroi se situata është nën kontroll. Ai shpjegoi se në një hotel atje ndodheshin rreth 130 nxënës, çka rriti përgjegjësinë dhe frikën. Nxënësit u larguan jashtë menjëherë pas lëkundjeve.
Në një lidhje me Klan Kosova, Grazhda u shpreh: "Mirë jemi, shyqyr Zotit gjithçka në rregull. Mbrëmë na ndodhi diçka, i kemi pasur 130 nxënës, dhe është FSK me shërbim këtu. Janë angazhuar të gjithë, i kemi nxjerrë nxënësit jashtë. Tërë natën kemi pritur se mos ndodh sërish". Ai theksoi se të gjithë janë mirë dhe FSK-ja ndodhej në vend për shërbim.
Autoritetet kanë njofuar qytetarët për udhëzimet e sigurisë gjatë dhe pas tërmeteve. Ato kanë apeluar për qetësi dhe respektim të masave mbrojtëse.