Një tërmet i fuqishëm me magnitudë 7.8 goditi jugun e Filipineve në orët e para të mëngjesit të së hënës, 8 qershor 2026. Lëkundjet sizmike u ndjenë fuqishëm pranë qytetit General Santos në ishullin Mindanao.
Sipas raportimeve të fundit, bilanci i viktimave është rënduar në të paktën 15 persona të vdekur dhe 129 të plagosur. Autoritetet lokale dhe ekipet e emergjencës janë angazhuar në terren për operacionet e kërkim-shpëtimit dhe vlerësimin e dëmeve, ndërsa raportohet për ndërtesa të shembura në disa zona të prekura.
Sipas Shërbimit Gjeologjik të Shteteve të Bashkuara (USGS), epiqendra u regjistrua rreth 56 kilometra në jug të qytetit General Santos, me një thellësi që varion nga 10 deri në 35 kilometra sipas institucioneve të ndryshme sizmologjike. Fillimisht, magnituda u raportua si 8.1, por më vonë u rishikua në 7.8 nga ekspertët.
Pas ngjarjes, u lëshua alarmi për cunami për vende si Filipinet, Indonezia, Japonia, Tajvani dhe Papua Guinea e Re. Megjithatë, shumica e paralajmërimeve janë tërhequr pasi rreziku u vlerësua si i kufizuar.
Presidenti i Filipineve, Ferdinand Marcos Jr., ka urdhëruar reagimin e menjëhershëm të agjencive qeveritare dhe ka pezulluar mësimin në zonat e prekura të Mindanaos. Ai u ka bërë thirrje banorëve të zonave bregdetare të zhvendosen në vende të larta për të shmangur rrezikun e pasgoditjeve dhe të cunamit.
Përditësime
Një tërmet i fuqishëm ka goditur ishullin Mindanao në Filipine, duke lënë të paktën 16 deri në 20 persona të vdekur dhe mbi 200 të plagosur. Lëkundjet, me epiqendër në jugperëndim të qytetit Maasim (provinca Sarangani), u regjistruan në orën 07:37 me kohën lokale. Instituti Phivolcs raportoi gjithashtu një cunami me lartësi deri në 1.4 metra. Ekipet e shpëtimit kanë identifikuar dëme të konsiderueshme në infrastrukturën kyçe, përfshirë shkolla dhe një urë.