Një tërmet me magnitudë 4.7 ka goditur zonën vullkanike të Campi Flegrei dhe qytetin e Napolit mbrëmjen e së premtes, në orën 19:46. Sipas raporteve të autoriteteve italiane, kjo është lëkundja sizmike më e fuqishme e regjistruar në rajon gjatë katër dekadave të fundit. Pas goditjes kryesore, sizmografët kanë regjistruar mbi 30 pasgoditje, duke përfshirë një lëkundje me magnitudë 3.8 rreth orës 22:00.
Bilanci zyrtar raporton 21 të plagosur, mes të cilëve dy persona ndodhen në gjendje kritike dhe po marrin trajtim mjekësor në spitalet lokale. Dëmet materiale janë përqendruar kryesisht në bashkinë e Pozzuolit, ku është raportuar shembja e dy ndërtesave të pabanuara, dëmtime në fasadat e objekteve, si dhe dëmtime të skelës portuale. Për shkak të rrezikut, rreth 22 familje janë evakuuar dhe banesat e tyre janë shpallur të pabanueshme, ndërsa qindra banorë të tjerë kanë zgjedhur të kalojnë natën jashtë nga frika e lëkundjeve të reja.
Situata në infrastrukturë paraqitet e vështirë, pasi dëmtimi i një shtylle të tensionit të lartë në zonën Agnano ka lënë përkohësisht pa energji elektrike rreth 100 mijë përdorues. Gjithashtu, autoritetet kanë pezulluar qarkullimin e trageteve dhe hidrofoilëve drejt ishujve, ndërsa shërbimet hekurudhore dhe metrotë janë ndërprerë për kontrolle teknike të sigurisë.
Kryeministrja italiane Giorgia Meloni dhe ministri i Mbrojtjes Civile, Nello Musumeci, janë duke ndjekur nga afër situatën. Prefekti i Napolit, Michele di Bari, ka aktivizuar Qendrën e Koordinimit të Ndihmës, ndërsa Njësia e Krizës, e kryesuar nga shefi i Mbrojtjes Civile, Fabio Ciciliano, është mbledhur për të menaxhuar operacionet e emergjencës. Qendra pritjeje për qytetarët janë hapur në pika të ndryshme, përfshirë ish-bazën e NATO-s në Bagnoli.
Përditësime
Sizmologët konfirmuan se pasgoditjet në rajon kanë kaluar pragun e 40 lëkundjeve. Lëkundja më e fuqishme pas tërmetit kryesor u shënua në orën 05:47, me magnitudë 3.1. Autoritetet raportuan se 22 familje janë evakuuar: 18 nga Via Sannino dhe 4 nga Via San Vitagliano. Rreth 70 banorë janë strehuar në qendrën e emergjencës në palestër, ndërsa kapacitetet pritëse janë zgjeruar me hapjen e pikave të reja, si ajo në Via Terracina. Sipas mjekëve, 21 personat e lënduar kanë pësuar kryesisht rrëzime, goditje nga copat e suvasë ose gjendje paniku gjatë largimit nga banesat.
Autoritetet kanë regjistruar rreth 60 tërmete në zonën e Fushave Flegreane. Për shkak të pasojave të goditjeve, janë ndërmarrë masat e mëposhtme:
- Mbrojtja Civile ka urdhëruar evakuimin e një pallati me 70 banorë pas konstatimit të dëmeve strukturore.
- Porti i Pozzuolit është mbyllur për verifikime teknike, ndërsa po vlerësohen kufizimet në zona të ndryshme bregdetare.
- Qarkullimi në linjën hekurudhore Circumflegrea është pezulluar pas shembjes së një muri përgjatë trasesë.
Autoritetet kanë raportuar se numri i të lënduarve ka shkuar në 26, nga 21 që ishin konfirmuar më parë. Operacionet e evakuimit janë intensifikuar për rreth 300 banorë në zonat më të goditura të Napolit dhe Fushave Flegreane. Sizmiologët regjistruan lëkundjen në një thellësi prej 3 kilometrash, ndërkohë që ekipet e emergjencës raportuan shembje të pjesshme të terrenit shkëmbor në zonën e prekur.