Një tërmet i fuqishëm me magnitudë 6.1 ballë të shkallës Rihter ka goditur rajonin e Hindu Kush në Afganistan. Institucionet ndërkombëtare sizmologjike kanë raportuar detaje të ndryshme mbi epiqendrën, bazuar në matjet e tyre.
Sipas Shërbimit Gjeologjik të Shteteve të Bashkuara (USGS), tërmeti ndodhi rreth 450 kilometra në verilindje të Kabulit, me një epiqendër në thellësi mbi 208 kilometra. Ndërkohë, Qendra Sizmologjike Evropiane-Mesdhetare (EMSC) raporton se epiqendra ishte 176 kilometra në lindje të Kunduzit dhe rreth 250 kilometra larg kryeqytetit, me një thellësi prej 190 kilometrash.
Lëkundjet sizmike janë ndjerë në provincat Khost dhe Nangarhar, si dhe në kryeqytetin Kabul. Raportimet tregojnë se lëkundjet kanë arritur deri në Islamabad, kryeqytetin e Pakistanit. Banorët në zonat e prekura kanë përshkruar një lëkundje të fortë dhe të gjatë, e cila është shoqëruar edhe me lëkundje pasuese. Aktualisht, nuk ka të dhëna për viktima apo dëme materiale, ndërsa situata vijon të jetë nën monitorimin e autoriteteve.