Një tërmet i fuqishëm ka goditur brigjet veriperëndimore të Kubës. Sipas të dhënave nga Qendra Kombëtare për Kërkime Sizmologjike (CENAIS), epiqendra e lëkundjeve u lokalizua rreth 100 kilometra në veriperëndim të qytetit të Mantuas, me një thellësi fokale prej 20 kilometrash.
Lëkundjet sizmike shkaktuan panik te banorët e zonës, të cilët braktisën ndërtesat dhe dolën në rrugë. Carmen Delgado, një ekonomiste nga Havana, përshkroi momentet e para të lëkundjes: “Në fillim ndjeva sikur po më rrotullohej koka. Nuk më shkoi ndërmend se ishte tërmet, pasi nuk kisha përjetuar kurrë diçka të tillë. Sapo kuptuam se çfarë po ndodhte, dolëm shpejt jashtë”.
Sizmologët ndërkombëtarë, përfshirë Shërbimin Gjeologjik të Shteteve të Bashkuara (USGS), Qendrën Sizmologjike Euro-Mesdhetare (EMSC) dhe Qendrën Gjermane të Kërkimeve të Gjeoshkencave (GFZ), e vlerësuan magnitudën në 6.1 ballë. Përveç Kubës, lëkundjet janë ndjerë edhe në rajonet juglindore të Shteteve të Bashkuara, konkretisht në Florida.
Deri në këto momente, autoritetet nuk kanë raportuar për viktima apo dëme të konsiderueshme materiale. Gjithashtu, nuk është lëshuar asnjë alarm për rrezik nga cunami.