Në orët e vona të së hënës, një lëkundje e fortë tërmeti është regjistruar në rajonin jugor të Italisë, Kalabri. Sipas të dhënave të publikuara nga Instituti Kombëtar i Gjeofizikës dhe Vullkanologjisë (INGV) në Romë, epiqendra e tërmetit u lokalizua 41 kilometra në perëndim të Kosenzës, në një thellësi prej 250 kilometrash.
Lëkundjet kanë qenë të ndjeshme në një gjerësi të madhe gjeografike, duke përfshirë zonat e Napolit, Vezuvit, Bazilikatës, Puglias dhe Sicilisë. Në disa qytete, qytetarët kanë dalë në rrugë, ndërsa janë regjistruar telefonata të shumta drejtuar shërbimeve të emergjencës për kërkim informacionesh.
Mbrojtja Civile e Kalabrisë ka zhvilluar komunikime të menjëhershme me kryetarët e bashkive në qytetet më pranë epiqendrës, si Cetraro, Lamezia Terme dhe Amantea. Deri në këto momente, institucionet zyrtare kanë njoftuar se nuk ka pasur kërkesa për ndërhyrje emergjente dhe nuk është raportuar asnjë pasojë në jetë njerëzish apo dëme materiale.
Lëkundjet janë ndjerë gjithashtu edhe në territorin e Shqipërisë, konkretisht në qytetin e Vlorës. Situata në zonat e prekura mbetet nën monitorim të vazhdueshëm nga autoritetet përkatëse.
Përditësime
Një tërmet me magnitudë 6.2 goditi rajonin e Kalabrisë, Itali, në orën 00:12. Menjëherë pas lëkundjeve, Njësia e Krizave të Mbrojtjes Civile, nën drejtimin e Fabio Ciciliano, nisi operacionet e emergjencës. Në orën 01:00, përfaqësuesit institucionalë zhvilluan një takim koordinues për vlerësimin e situatës në terren.