Pas tërmeteve shkatërruese që goditën Venezuelën gjatë natës, situata në terren mbetet kritike, me ekipet e shpëtimit që po punojnë intensivisht nën rrënoja. Presidenti i përkohshëm, Delsey Rodriguez, konfirmoi se deri më tani janë shënuar 164 viktima dhe 971 të lënduar.
Përpjekjet për lokalizimin e qytetarëve
Në lidhje me personat e zhdukur, vlerësimet janë mbështetur në të dhënat e një platforme online të krijuar për të ndihmuar familjet në kërkim të të afërmve të tyre. Sipas burimeve të cituara nga Sky News, numri i personave të raportuar si të zhdukur ka arritur në 26.086.
Autoritetet kanë theksuar se kjo shifër nuk përfaqëson një bilanc zyrtar të shtetit, por pasqyron vështirësitë në komunikim dhe pasigurinë në terren. Nga ana tjetër, të dhënat tregojnë se mbi 1.200 persona, të cilët ishin deklaruar fillimisht si të humbur, tashmë janë gjetur dhe ndodhen në siguri.
Dëmet dhe situata në terren
Lëkundjet sizmike, të vlerësuara me magnitudë 7.5 dhe 7.2, kanë shkaktuar dëme të mëdha materiale, me dhjetëra ndërtesa të shemura ose të dëmtuara rëndë në kryeqytetin Karakas dhe zonat përreth. Qeveria ka shpallur gjendjen e emergjencës, ndërsa qytetarët vazhdojnë të shfrytëzojnë rrjetet sociale për të shpërndarë informacione mbi fatin e familjarëve të tyre.
Përditësime
Presidentja në detyrë, Delcy Rodriguez, njoftoi se numri i personave të zhdukur nga tërmetet ka arritur në 30,000. Autoritetet parashikojnë rritje të ndjeshme të bilancit të viktimave dhe e kanë klasifikuar situatën si një krizë të rëndë humanitare.
Zyrtari Jorge Rodriguez raportoi se bilanci i tërmeteve në Venezuelë është rritur në 188 viktima dhe 1520 të plagosur, ndërsa ekipet e shpëtimit vijojnë operacionet për nxjerrjen e 200 personave të bllokuar nën rrënoja. Kryqi i Kuq ka bërë thirrje për ndihmë emergjente, duke kërkuar furnizime me:
- Maska kundër pluhurit;
- Ujë të pijshëm;
- Strehim për të pastrehët.