Teuta dhe Partizani kanë barazuar 2-2 në ndeshjen e javës së 29-të të Abissnet Superiore, në stadiumin Niko Dovana të Durrësit.
Trajneri i Teutës, Enkeleid Dobi, analizoi barazimin duke theksuar gabimet e përsëritura dhe naivitetin në momente kyçe. Ai vlerësoi volumin e lartë të lojtarëve, por kritikoi mungesën e përqendrimit pas humbjes së topit. "Futbolli është lojë gabimesh, por jemi pak naivë. Përqendrimi duhet të jetë më i madh", tha Dobi.
Sipas tij, Teuta kishte kontrollin në pjesën e parë, ku Partizani nuk rrezikoi përveç një aksioni. Skuadra durrsake dallohet për presingun ofensiv, por ishte me vonesë në rikuperimin e topave. Golin e parë e pësuan kur kishin topin në posedim. Dobi përmendi se pas golave reaguuan duke barazuar në 1-1 dhe 2-2, por ndeshje të tilla duhen fituar.
Problemet në sulm erdhën nga dalja e Dacit, që la alternativat e cunguara dhe e vështirësoi adaptimin për shkak të mungesave të tjera. Trajneri theksoi nevojën për më shumë efikasitet ofensiv dhe vigjilencë në goditjet standarde, ku Zogos duhej të kishte shënuar më shumë. "Zogos duhet të bënte tripletë në goditje standarde", u shpreh ai.
Dobi shprehu keqardhje për tifozët që prisnin fitoren dhe tri pikët, duke pranuar se Partizani është ekip në formë. Skuadra synon të futet në garë për Final Four-in dhe duhet të reagojë në ndeshjet e ardhshme.