Analisti Eduard Zaloshnja ka ekstrapoluar statistikisht rezultatet e sondazhit të fundit ‘Zëri i Shqiptarëve’. Sipas tij, koalicioni i Partisë Demokratike (PD) ka zbritur në kuotën e 54 votave brenda vendit për çdo 100 vota të Partisë Socialiste (PS). Kjo nënkupton se votat e PS-së janë pothuajse dyfishi i atyre të koalicionit të PD-së. Partitë e tjera të vogla kanë zbritur në 11 vota për çdo 100 vota të PS-së.
Vetëm tetë muaj më parë, koalicioni PD-ASHM mori 66 vota për çdo 100 vota të PS-së brenda vendit, ndërsa partitë e vogla 26 vota. Si rezultat i zgjedhjeve të majit, PS-ja siguroi 82 mandate parlamentare nga votat brendshme dhe një tjetër në qarkun e Vlorës nga votat me postë të emigrantëve. Koalicioni i PD-së siguroi 50 mandate, ndërsa partitë e vogla gjithsej 7 mandate.
Katër vjet më parë, kur pjesëmarrja e zgjedhësve të brendshëm ishte më e lartë, hendeku i votave dhe mandateve midis PS-së dhe PD-së etj. ishte i ngushtë. Atëherë opozita udhëhiqej zyrtarisht nga Basha.
Zaloshnja vë në dukje se, teksa pjesëmarrja në zgjedhje brenda vendit bie, votat për PD-në etj. vazhdojnë rënien me ritme më të theksuara. Votat e janarit bazohen në dy sondazhet e fundit. Nëse zhvillohen zgjedhje sot, PS-ja mund të sigurojë më shumë mandate se sa mori vjet, ndërsa PD-ja etj. edhe më pak.