Thinking Machines Lab, startup-i i inteligjencës artificiale i themeluar nga Mira Murati, ish-drejtoresha teknologjike e OpenAI, ka prezantuar teknologjinë e re interaction models ose modele ndërveprimi.
Kjo teknologji synon të bëjë komunikimin me AI më natyral, duke lejuar dëgjim dhe përgjigje njëkohësisht, si në një telefonatë reale.
Aktualisht, shumica e modeleve AI funksionojnë me një sekuencë të thjeshtë: përdoruesi flet, sistemi dëgjon dhe pastaj përgjigjet. Thinking Machines Lab zhvillon një sistem full duplex, që përpunon hyrjen dhe gjeneron përgjigjen në të njëjtën kohë. Kjo lejon ndërprerje natyrale gjatë bisedës, duke e bërë ndërveprimin më të ngjashëm me komunikimin njerëzor.
Modeli eksperimental TML-Interaction-Small arrin përgjigje brenda 0.40 sekondash, shpejtësi që afrohet me reagimin njerëzor dhe tejkalon sistemet e OpenAI dhe Google. Kompania do të vazhdojë testimet gjatë muajve të ardhshëm, ndërsa një version për përdorim të gjerë mund të prezantohet më vonë këtë vit.
Projekti është ende në fazë kërkimore dhe nuk është i disponueshëm në treg. Ekspertët e teknologjisë e cilësojnë premtues, por theksojnë se suksesi do të varet nga përvoja reale e përdoruesve në komunikime të përditshme.