Revolta qytetare kundër qeverisë ka hyrë në ditën e saj të 13-të. Organizatorët kanë bërë thirrje për një mobilizim masiv të qytetarëve në Bulevardin Dëshmorët e Kombit, si reagim ndaj nismës së kryeministrit Edi Rama për të mbajtur një tubim, të cilin protestuesit e cilësojnë si "antimiting", në të njëjtin orar në Sheshin Italia.
Sipas raportimeve, strukturat e Partisë Socialiste në Tiranë janë angazhuar për të siguruar pjesëmarrjen në tubimin e thirrur nga kryeministri. Protestuesit e kanë konsideruar këtë nismë si një përpjekje për të krijuar një imazh mbështetjeje përmes administratës publike.
Në thirrjet e bëra publike, vëmendje e veçantë u është kushtuar punonjësve të administratës, të cilëve u kërkohet të mos bëhen pjesë e asaj që protestuesit e quajnë "mburojë politike". Organizatorët u bëjnë thirrje punonjësve të shtetit që të rreshtohen krah kërkesave për ndryshim, duke theksuar se pjesëmarrja masive është mënyra e vetme për t'iu kundërvënë qëndrimit të qeverisë.