Kryeqyteti shqiptar po përjeton një valë protestash prej më shumë se dy javësh. Protestuesit kërkojnë dorëheqjen e kryeministrit Edi Rama, duke e cilësuar këtë lëvizje si një reagim ndaj situatës politike dhe ekonomike në vend.
Lëvizja organizohet çdo ditë në orën 18:00 në sheshin Skënderbej, për të vijuar më pas me një marshim drejt bulevardit Dëshmorët e Kombit. Pasi stacionohen për disa orë përpara Kryeministrisë, ku mbajnë fjalime, protestuesit nisin marshimin nëpër rrugët kryesore të Tiranës, duke ndikuar herë pas here në qarkullimin e automjeteve.
Gjatë tubimeve, pjesëmarrësit artikulojnë kërkesa përmes thirrjeve si "Rama jep dorëheqjen", "Rama ik", si dhe "Rama në burg, Berisha në burg". Në protestat e fundit është vënë re një pjesëmarrje e gjerë, përfshirë studentë dhe qytetarë të ardhur nga diaspora.
Aktivitete të ngjashme janë regjistruar edhe në qytete të tjera të vendit, si Vlorë, Pogradec, Durrës dhe Shkodër, si dhe tubime të organizuara nga shqiptarët jashtë vendit. Organizatorët dhe pjesëmarrësit deklarojnë se nuk do të pranojnë kompromise dhe se do të vazhdojnë mobilizimin deri në plotësimin e kërkesave të tyre politike.
Përditësime
Protestuesit kanë rrethuar për të dytën herë brenda pak orësh godinën e Kryeministrisë. Pasi braktisën bulevardin 'Dëshmorët e Kombit', turma zhvilloi një marshim përmes rrugëve kryesore të Tiranës për të kërkuar dorëheqjen e qeverisë.