Protesta e 19-të qytetare në Tiranë ka përfunduar pas një marshimi nëpër rrugët kryesore të kryeqytetit. Tubimi nisi në sheshin Skënderbej, për t'u zhvendosur më pas drejt godinës së Parlamentit gjatë zhvillimit të seancës plenare, dhe përfundoi para Kryeministrisë.
Gjatë marshimit, protestuesit kaluan në zona të ndryshme, si Vasil Shanto, Komuna e Parisit dhe Ish-Blloku. Pjesëmarrësit shprehën kërkesat e tyre për dorëheqjen e kryeministrit Edi Rama dhe refuzuan çdo formë dialogu me qeverinë. Organizatorët kanë njoftuar se mobilizimi do të vazhdojë me tubimin e 20-të, i cili do të mbahet sot në orën 19:00.
Vendimi për mbajtjen e protestës në këtë orar është ndërmarrë nga organizatorët për shkak të temperaturave të larta që kanë përfshirë vendin. Kërkesat e protestuesve mbeten të pandryshuara, duke theksuar nevojën për largimin e qeverisë aktuale.