Sot në orën 19:00 do të mbahet protesta e 18-të në Tiranë, ku qytetarët kërkojnë dorëheqjen e kryeministrit Edi Rama dhe largimin e qeverisë. Ndryshimi i orarit të tubimit është vendosur për shkak të temperaturave të larta që kanë përfshirë vendin.
Pas 17 ditësh protestash të pandërprera, pjesëmarrësit pritet të grumbullohen para godinës së Kryeministrisë, për të zhvilluar më pas një marshim nëpër rrugët kryesore të kryeqytetit. Gjatë këtyre ditëve, protestuesit kanë artikuluar pesë kërkesa kryesore për ekzekutivin:
• Largimi i qeverisë.
• Shfuqizimi i statusit dhe kuadrit ligjor për investitorët strategjikë.
• Anulimi i "Paketës së Maleve".
• Anulimi i ndryshimeve në Ligjin për Zonat e Mbrojtura.
• Anulimi i ndryshimeve në Ligjin për Trashëgiminë Kulturore.
Organizatorët dhe qytetarët kanë theksuar vendosmërinë për të vazhduar mobilizimin deri në realizimin e kërkesave të tyre politike.
Përditësime
Sot në Tiranë u mbajt protesta e 18-të kundër qeverisë. Pjesëmarrësit shprehën kritika të ashpra ndaj opozitës tradicionale, duke promovuar sloganin “Opozita jemi ne” si thirrje për një përfaqësim të ri qytetar.