Këtë të hënë, qytetarët vijojnë serinë e protestave kundër qeverisë, duke u mbledhur për të 16-ën herë në kryeqytet. Organizatorët kanë njoftuar grumbullimin në sheshin “Skënderbej” në orën 18:00, pasuar nga një marshim drejt Kryeministrisë, ku aktivistët dhe qytetarët shprehin shqetësimet e tyre për klasën politike.
Lëvizja e sotme vjen pas një proteste të gjerë të zhvilluar më 14 qershor, e cila u shtri deri në rrugën e Rinasit dhe vijoi përgjatë autostradës Tiranë-Durrës. Gjatë marshimeve të fundit, pjesëmarrësit kanë kërkuar dorëheqjen e kryeministrit Edi Rama dhe largimin e kastës aktuale politike, përmes thirrjeve të ndryshme.
Revolta qytetare është manifestuar edhe në qytete të tjera të Shqipërisë, përfshirë Vlorën, Pogradecin, Durrësin dhe Shkodrën. Gjithashtu, tubime në mbështetje të këtyre kërkesave janë raportuar edhe nga bashkatdhetarët jashtë vendit.
Përditësime
Organizatorët e protestës së 16-të kundër kryeministrit Edi Rama parashikojnë pjesëmarrje të gjerë në Tiranë. Policia e Shtetit do të monitorojë situatën, ndërsa marshimi i protestuesve pas tubimit para Kryeministrisë pritet të shkaktojë bllokime në disa akse kryesore të kryeqytetit.