Lëvizja serbe "Zemra e Heronjve", me seli në Kralevë, publikoi më 18 korrik një deklaratë përmes së cilës i kërkoi Prokurorisë për Krime Lufte të Serbisë dhe Departamentit për Krime Lufte në Beograd verifikimin e listave me emrat dhe të dhënat personale të ish-pjesëtarëve të Ushtrisë Çlirimtare të Kosovës.
Listat e publikuara përfshijnë persona që pretendohet se kanë shërbyer në Brigadën 111 dhe Brigadën 121 të UÇK-së. Përveç kërkesës për ndjekje penale brenda Serbisë, organizata ka kërkuar që këto të dhëna t’u përcillen autoriteteve policore të vendeve të Bashkimit Evropian, me synimin që ndaj personave të listuar të ndërmerren masa arrestimi edhe jashtë territorit serb.
Kryetari i Organizatës së Veteranëve të Luftës së UÇK-së, Hysni Gucati, reagoi lidhur me këto zhvillime duke u kërkuar bashkëluftëtarëve të shmangin kalimin tranzit përmes Serbisë. Ai theksoi se këto veprime janë një realitet që shteti serb mund ta shfrytëzojë në çdo moment kundër ish-pjesëtarëve të UÇK-së.
Këto nisma vijnë në një periudhë kur autoritetet serbe po vazhdojnë të ndalojnë shtetas shqiptarë në pikat kufitare, nën dyshime për krime lufte. OVL e UÇK-së dhe Instituti "Octopus" i kanë cilësuar këto masa si pjesë të një strategjie të organizuar kundër Kosovës dhe ish-luftëtarëve të saj.