Organizata e Veteranëve të Luftës së Ushtrisë Çlirimtare të Kosovës (OVL-UÇK) ka dënuar ashpër fushatën e vazhdueshme të institucioneve të Serbisë kundër ish-pjesëtarëve të kësaj force. Sipas organizatës, autoritetet në Beograd po ndjekin një strategji për të kriminalizuar luftën çlirimtare përmes akuzave të motivuara politikisht dhe thirrjeve publike për arrestim.
Sipas OVL-UÇK-së, në shënjestër të këtyre veprimeve janë vënë veçanërisht ish-pjesëtarët e Brigadës 111 dhe Brigadës 121, si dhe njësive të tjera. Organizata vlerëson se listat e hartuara nga autoritetet serbe synojnë barazimin e agresorit me viktimën dhe frikësimin e atyre që luftuan për lirinë e Kosovës.
Në këto rrethana, OVL-UÇK u ka bërë thirrje të gjithë ish-pjesëtarëve të UÇK-së që të shmangin kalimin nëpër territorin e Serbisë, duke paralajmëruar se rreziku i ndalimeve mbetet i lartë. Në reagimin e saj, organizata thekson se lufta çlirimtare ishte e drejtë dhe se përpjekjet për ta njollosur atë përmes mjeteve juridike serbe nuk mund ta rishkruajnë historinë apo të minojnë të vërtetën mbi shtetësinë e Kosovës.