Organizata e Veteranëve të Luftës së Ushtrisë Çlirimtare të Kosovës (OVL e UÇK-së) ka reaguar më 10 shkurt 2026 kundër përmbajtjes dhe gjuhës së fjalëve përmbyllëse të Prokurorisë në Dhomat e Specializuara në Hagë.
Në reagim thuhet se pretendimet e paraqitura, përfshirë etiketimin e udhëheqjes së UÇK-së si pjesë e një 'ndërmarrjeje të përbashkët kriminale', përbëjnë tentativë për kriminalizimin e luftës çlirimtare dhe rishkrimin e historisë së rezistencës së popullit të Kosovës.
OVL e UÇK-së thekson se UÇK-ja mbetet ushtri çlirimtare, e lindur nga nevoja për mbijetesë dhe liri, e mbështetur nga populli dhe e njohur nga bashkësia ndërkombëtare si palë legjitime në luftën kundër regjimit serb.
Organizata riafirmon se gjykata zhvillon një proces selektiv dhe të njëanshëm, duke injoruar krimet shtetërore të Serbisë dhe duke u fokusuar mbi drejtuesit e luftës çlirimtare.
“Drejtësia e vërtetë nuk ndërtohet mbi shtrembërim faktesh, por mbi të vërtetën e plotë”, thuhet në reagim, ku theksohet se do të vazhdojnë mbrojtjen e të vërtetës historike, dinjitetit të luftës dhe figurës së bashkëluftëtarëve.