Pas ndeshjes së futbollit mes Japonisë dhe Holandës, e cila u mbyll me rezultatin 2-2, tifozët japonezë ndoqën traditën e tyre të mirënjohur: pastrimin e tribunave të stadiumit. Të pajisur me qese, ata mblodhën mbeturinat përpara se të largoheshin nga impianti sportiv në Dallas.
Kjo sjellje është shndërruar në një simbol të kulturës sportive japoneze që nga debutimi i tyre në Kupën e Botës në vitin 1998. Praktika është dëshmuar në edicione të ndryshme, si në Rusi 2018 dhe Katar 2022. Përveç tifozëve, edhe lojtarët japonezë njihen për pastrimin e dhomave të zhveshjes, të cilat i lënë të rregullta dhe shpesh të shoqëruara me shënime falënderimi për organizatorët.
Ekspertët e lidhin këtë fenomen me edukimin që në fëmijëri dhe konceptin japonez "meiwaku", i cili thekson shmangien e shqetësimit për të tjerët. Sipas filozofisë "Tatsu tori ato wo nigosazu", që përkthehet "zogu nuk lë gjurmë pas", pastrimi shihet si një përgjegjësi kolektive dhe shprehje respekti ndaj ambientit mikpritës. Një tifoze, përmes një deklarate për kanalin zyrtar të FIFA-s, theksoi se veprimi është një formë nderimi ndaj lojtarëve, tifozëve të tjerë dhe stadiumit, duke shtuar: "Jemi të nderuar që jemi këtu".