Aktori indian Tiger Shroff, 36 vjeç, nuk u lëndua kur persona të paidentifikuar qëlluan ndaj automjetit ku po udhëtonte në lagjen Juhu të Mumbait, të dielën në mbrëmje, më 18 tetor. Nga të shtënat u plagosën dy persona, mes tyre shoferi i aktorit.
Sipas mediave vendase, Shroff po largohej nga një klub futbolli ku kishte shkuar për të luajtur, kur persona të armatosur iu afruan automjetit dhe qëlluan nga afër. Pamjet e publikuara nga mediat duket se tregojnë të paktën dy persona duke qëlluar disa herë drejt makinës. Pranë saj ndodheshin edhe qytetarë të tjerë.
Policia e Mumbait bëri të ditur se dy persona u plagosën. Përveç shoferit të Shroff, mediat lokale raportuan se u lëndua edhe drejtuesi i një taksie me tri rrota, i cili ndodhej pranë vendit të ngjarjes. Shoferi i aktorit u dërgua për trajtim mjekësor.
Autoritetet kanë nisur hetimet për identifikimin dhe kapjen e autorëve. Policia po mbledh dëshmi dhe po shqyrton pamjet e kamerave të sigurisë për të sqaruar rrethanat e sulmit. Mediat indiane raportojnë se po verifikohet edhe një pretendim për marrjen e përgjegjësisë nga një organizatë kriminale e lidhur me Lawrence Bishnoi. Deri tani, ky pretendim nuk është konfirmuar zyrtarisht.
Zëvendëskryeministri i Maharashtras, Eknath Shinde, vizitoi aktorin pas ngjarjes dhe e dënoi sulmin. “Këto përpjekje për frikësim nuk do të tolerohen dhe ne do t’i japim fund këtij lloj huliganizmi”, deklaroi ai.
Ngjarja riktheu vëmendjen te siguria e figurave publike në Indi. Në vitin 2024, policia arrestoi dy persona të dyshuar për përfshirje në të shtënat ndaj banesës së aktorit Salman Khan. Po atë vit, politikani Baba Siddique u vra nga persona të armatosur në Mumbai. Vrasja nxiti reagime dhe shqetësime për veprimtarinë e grupeve kriminale.
Shroff debutoi në film në vitin 2014, me prodhimin romantik Heropanti, dhe më pas u bë i njohur për rolet në filma aksion. Ai merret edhe me futboll; për të luajtur këtë sport kishte shkuar në klubin nga i cili po largohej kur ndodhi sulmi.