Mesfushori Tim Civeja ka ndryshuar ambient në futbollin gjerman, duke u bashkuar zyrtarisht me skuadrën e Karlsruher për sezonin e ardhshëm, që militon në Bundesliga 2. Ky transferim pason një kontribut trevjeçar te skuadra e Sarbruken, në kategorinë e tretë gjermane.
Gjatë kohës së tij te Sarbruken, Civeja zhvilloi gjithsej 116 ndeshje, ku realizoi 18 gola dhe dha 14 asiste. Sezoni i fundit u konsiderua si më i miri për 24-vjeçarin, i cili kontribuoi me 6 gola dhe 7 asiste.
Lojtari, i cili ka lindur në Gjermani, e ka zhvilluar të gjithë karrierën e tij profesionale në këtë vend. Në rrugëtimin e tij ndërkombëtar, pasi përfaqësoi Gjermaninë U-19, ai vendosi të luajë për ekipet zinxhir të Shqipërisë, duke u aktivizuar me Shqipërinë U-21. Përvoja e tij në futbollin elitar gjerman daton që në moshën 19-vjeçare, kur debutoi në Bundesligë me skuadrën e Augsburg.