Teatri i Hapur "Mirush Kabashi" pranë Liqenit Artificial në Tiranë u bë skenë e edicionit të pestë të Gjon Mili Jazz & Blues Festival. Festivali, që tashmë është shndërruar në një ndër ngjarjet kryesore të zhanrit të xhazit në Shqipëri, ofroi një program të larmishëm me pjesëmarrjen e instrumentistëve të mirënjohur ndërkombëtarë dhe vendas.
Hapja e koncertit u karakterizua nga performanca e parë në vend e saksofonistes dhe kompozitores austriake Yvonne Moriel, fituese e çmimit Austrian Jazz Award 2024 në kategorinë Best Newcomer. Ajo u shoqërua në piano dhe tastierë nga pianisti Gent Rushi dhe bateristi Besjan Herri, duke prezantuar një repertor me kompozime origjinale që ndërthurin xhazin bashkëkohor me elemente elektronike.
Pas kësaj, në skenë u ngjit Gert Kapo Quartet, projekti i pianistit dhe kompozitorit shqiptaro-gjerman Gert Kapo. Muzika e këtij formacioni karakterizohet nga ndërthurja e ritmeve tradicionale ballkanike, orientale dhe mesdhetare me ndikime nga World Music, funk dhe jazz-i bashkëkohor. Në përbërje të këtij kuarteti janë:
• Epaminondas Ladas (Greqi) – kitarë dhe oud
• Armin Alic (Gjermani/Bosnjë dhe Hercegovinë) – bas
• Mirek Pyschny (Poloni) – bateri
Festivali nxiti një dialog artistik ndërkulturor, duke theksuar bashkëpunimin ndërmjet skenave muzikore evropiane dhe asaj shqiptare.