Qyteti i Korçës është shndërruar për dy ditë në qendrën e muzikës frymore, duke mirëpritur edicionin e dytë të Festivalit Ndërkombëtar të Bandave. Aktiviteti përfshin një sërë paradash dhe koncertesh në hapësirat kryesore, si Pazari i Vjetër, duke synuar pasurimin e ofertës turistike dhe edukimin e brezit të ri me instrumentet e frymës.
Në këtë edicion marrin pjesë mbi 200 artistë nga Shqipëria, Italia, Mali i Zi, Kosova dhe Maqedonia e Veriut. Ndër grupet spikasin Banda e Qytetit të Korçës dhe Orkestra Frymore e Forcave të Armatosura të Shqipërisë. Vëmendje të veçantë mori pjesëmarrja për herë të parë e orkestrës nga Kotori (Mali i Zi), e themeluar në vitin 1842, si dhe banda italiane me një histori shekullore në interpretimin e muzikës frymore.
Organizatori Ilir Kodhima e vlerësoi këtë edicion si një mundësi për të krijuar ura bashkëpunimi mes artistëve të rajonit. Nga ana tjetër, Blerta Belliu, drejtoreshë e Qendrës së Artit dhe Kulturës në Korçë, theksoi rolin e festivalit në ruajtjen e traditës së instrumenteve të frymës. Dirigjentët, përfshirë majorin Altin Babameto, vlerësuan mikpritjen e qytetit dhe atmosferën festive të krijuar përgjatë performancave.