Qyteti i Korçës u kthye gjatë fundjavës në një qendër për pasionantët e motorëve dhe muzikës rock përmes organizimit të Moto & Rock Festival. Aktiviteti dyditor mblodhi në qytet qindra vizitorë nga Shqipëria dhe vendet e rajonit, duke forcuar statusin e qytetit si një destinacion për evente kulturore dhe turistike.
Në festival morën pjesë mbi 60 motoristë, të cilët realizuan parada përgjatë rrugëve të qytetit. Një risi e këtij edicioni ishte pjesëmarrja e makinave amerikane në paradën festive, të cilat u bashkuan me motorët dhe automjetet klasike. Atmosfera muzikore u garantua nga performancat live të Urban Band dhe këngëtarit Renis Gjoka.
Kryebashkiaku i Korçës, Sotiraq Filo, shprehu vlerësimin për grupin Riders Legend për bashkëpunimin në organizimin e eventit, duke e kthyer qytetin në pikëtakim për motoristët nga i gjithë rajoni. Nga ana tjetër, Kryeministri Edi Rama ndau në rrjetet sociale një galeri fotografike, duke e cilësuar Korçën si kryeqytetin e verës festive dhe një destinacion të rëndësishëm turistik.