Qyteti i Korçës u shndërrua për dy netë në një qendër të rëndësishme për muzikën dhe kulturën, falë zhvillimit të Festivalit Ndërkombëtar të Bandave Frymore, të njohur si Air Beat Festival – Lulu Fest. Aktiviteti mblodhi mbi 200 muzikantë nga Shqipëria, Italia, Mali i Zi, Kosova dhe Maqedonia e Veriut, të cilët prezantuan repertore të larmishme dhe traditat muzikore të vendeve që përfaqësonin.
Paradat dhe koncertet, të cilat u zhvilluan në hapësirat publike të qytetit, tërhoqën një numër të madh spektatorësh. Ky edicion synon forcimin e Korçës si një destinacion kulturor dhe turistik gjatë sezonit veror. Përmes një publikimi në rrjetet sociale, Kryeministri Edi Rama theksoi se festivali u shndërrua në një pikëtakim ndërkombëtar për artistët dhe publikun, duke ndikuar në pasurimin e ofertës kulturore për vizitorët vendas dhe të huaj.