Sipas raportit të fundit të publikuar nga Tradingpedia, i cili analizoi të dhënat e 37 kryeqyteteve europiane, Tirana renditet si qyteti i dytë më i shtrenjtë në kontinent për sa i përket përballueshmërisë së kostos së jetesës. Studimi krahasoi pagat mesatare neto me shpenzimet mujore të nevojshme për një familje me katër anëtarë.
Në Tiranë, me një pagë mesatare neto prej 760 euro për individ, të ardhurat e përgjithshme familjare (me dy prindër të punësuar) përllogariten në 1520 euro në muaj. Shpenzimet për një jetesë normale llogariten në 1353 euro, çka nënkupton se familjet në kryeqytetin shqiptar duhet të shpenzojnë rreth 89% të të ardhurave të tyre për shpenzime bazë.
Në krahasim me vendet e tjera të rajonit, Shqipëria paraqet një barrë financiare më të rëndë për qytetarët:
• Shkup: Paga neto është 769 euro, ndërsa shpenzimet zënë 67% të të ardhurave.
• Beograd: Paga neto arrin në 1081 euro, ndërsa shpenzimet përfaqësojnë 68.2% të të ardhurave.
• Podgoricë: Paga mesatare neto është 883 euro, me shpenzime mujore prej 1077 euro.
Raporti thekson se përballueshmëria mbetet një ndër sfidat kryesore ekonomike për qytetarët, ndërsa inflacioni vazhdon të ndikojë drejtpërdrejt në buxhetet familjare në të gjithë Europën.