Për të 37-ën herë radhazi, qytetarët janë mbledhur në kryeqytetin shqiptar për të shprehur pakënaqësinë ndaj qeverisë. Protesta, e cila nisi në orën 19:00 në sheshin Skënderbej, është zhvendosur me një marshim drejt godinës së Kryeministrisë, ku është përqendruar edhe tubimi kryesor.
Organizatorët e lëvizjes kanë bërë thirrje për pjesëmarrje masive, duke iu drejtuar qytetarëve nga çdo zonë e vendit dhe pjesëtarëve të diasporës që kanë mbërritur në Tiranë. Sipas tyre, kërkesa për largimin e kryeministrit Edi Rama mbetet e panegociueshme. Me sloganin “Ju erdhi fundi”, pjesëmarrësit shprehën vullnetin për të vazhduar protestat deri në përmbushjen e këtij objektivi.
Përveç kërkesës politike për dorëheqjen e kreut të qeverisë, organizatorët kanë theksuar se kjo nismë shërben si një thirrje për llogaridhënie dhe transparencë nga institucionet shtetërore. Ata i kanë kërkuar shoqërisë, drejtësisë, mediave dhe biznesit që të mbajnë përgjegjësitë përkatëse për situatën në vend, duke vënë theksin te mbrojtja e vlerave demokratike dhe integriteti i votës.