Toni Kroos, ish-mesfushor i Real Madridit, shprehu dyshimet për shanset e Barcelonës në Ligën e Kampionëve. Në podcastin “Einfach mal Luppen”, të drejtuar bashkë me vëllain e tij Felix Kroos, ai tha se skuadra katalanase nuk do të fitojë asnjë titull kontinental.
Barcelona sapo festoi fitoren 3-2 kundër Real Madridit në Superkupën e Spanjës, të luajtur në Arabinë Saudite. Ky sukses ka rritur besimin në kampin e trajnerit Hansi Flick, i cili synon trofe në La Liga, Kupën e Mbretit dhe mbi të gjitha në Ligën e Kampionëve, të cilën nuk e kanë fituar prej 11 vitesh.
Kroos pranoi se stili i lojës i Barcelonës është “një nga më tërheqësit në Europë”, por theksoi cenueshmërinë: “Barça duket e lumtur me Superkupën, por tani vjen Liga e Kampionëve me kundërshtarë të nivelit të lartë. Nuk do të fitojë asnjë titull kontinental, të paktën kështu mendoj unë”.
Ai shpjegoi se katalanasit marrin shumë rreziqe, duke u mbështetur te cilësia individuale e lojtarëve si Pedri, Lamine Yamal dhe Raphinha. “Në një ditë të keqe për Pedrin, Lamine Yamalin ose Raphinhan, çdo skuadër mund t’i godasë dhe t’i nxjerrë jashtë Champions League”, shtoi Kroos.
Për të pasur shanse reale, Barcelona ka nevojë për mbrojtje të fortë. Rikthimi në formë i Pau Cubarsí-së dhe Ronald Araujós konsiderohet çelësor. Aktualisht, ata janë dy pikë larg vendit të tetë në fazën e grupeve, me ndeshje të mbetura ndaj Slavia Pragës dhe Copenhagenit.