Shaqir Totaj, kryetar i degës së Partisë Demokratike të Kosovës (PDK) në Prizren, deklaroi se Nait Hasani nuk është propozuar për deputet nga dega e tij. "S’e kemi propozuar Nait Hasanin e as të tjerët", tha ai në një lidhje direkte në T7, ku mohoi pretendimin e Hasanit.
Nait Hasani, i përmendur mes personave për të cilët ekzistojnë dyshime për manipulim votash në zgjedhjet e 28 dhjetorit, kishte thënë se dega e PDK-së në Prizren e kishte propozuar atë për deputet. Megjithatë, Totaj e demantoi plotësisht, duke theksuar se në listë nuk janë përfshirë ata që dyshohen për këto veprime.
Sa i përket çështjes së dyshimeve për manipulim votash në Prizren, Totaj shpjegoi se dega e PDK-së ka vendosur të reflektojë derisa rasti të marrë epilog ligjor. "Derisa të qartësohet në aspektin ligjor, kemi konsideruar që PDK dega në Prizren duhet të reflektojë, dhe ata persona në këto zgjedhje të mos jenë pjesë e garës, ndërsa në zgjedhjet e tjera, kur të qartësohet në aspektin ligjor, të rikthehen në detyrat e tyre", deklaroi ai.
Totaj vlerësoi se procesi zgjedhor në Prizren ka qenë i komprometuar. "Procesi si i tillë ka qenë i komprometuar dhe ne natyrisht që do reflektojmë", shtoi kryetari i degës.
Përditësime
Totaj e akuzoi Bedri Hamzën se nuk e kishte respektuar kërkesën e tij për mospropozim të të dyshuarve për manipulim votash në listën e deputetëve të PDK Prizren, duke përfshirë Nait Hasanin.
Hamza vetë kishte kërkuar mospropozimin e të dyshuarve.
"Ne kemi respektuar kërkesën e kryetarit. I bie që kryetari e ka kërkuar vetë e nuk e ka respektuar," tha Totaj.
Nait Hasanit iu anuluan mbi 6 mijë vota në zgjedhjet e dhjetorit.
Totaj nuk kandidoi për deputet, duke respektuar votën për kryetar komune dhe standardet për kryetarët.