Nait Hasani, kandidati i Partisë Demokratike të Kosovës (PDK) për deputet, reagoi për humbjen e 3 mijë e 414 votave gjatë rinumërimit të votave në zgjedhjet parlamentare të 28 dhjetorit 2025. Ai renditet i dyti në PDK për nga humbja e votave në këtë proces, i cili po zhvillohet në 914 vendvotime dhe nuk ka përfunduar ende.
Hasani shkroi në një postim se votat e tij u rritën në mënyrë të padrejtë gjatë zgjedhjeve, duke u përdorur emri i tij për manipulime të papranueshme zgjedhore. Sipas tij, kjo cenoi vullnetin e lirë të qytetarëve dhe sulmoi dinjitetin e tij politik e kombëtar. Ai e cilëson veprimin si shkelje ligjore, akt moral e politik të rëndë.
Deputeti i zgjedhur theksoi se refuzon kategorikisht çdo votë që nuk buron nga vullneti i lirë i qytetarëve. "Nuk kam hyrë në politikë për të fituar me mashtrime, por për të fituar me besim. Nuk kam nevojë për vota të vjedhura, sepse respektoj votën e ndershme më shumë se çdo rezultat", deklaroi ai.
Hasani bëri thirrje që drejtësia të mos heshtë dhe premtoi se as ai nuk do të heshtë. Ai shtoi se do të qëndrojë në anën e qytetarëve, të votës së lirë dhe të së vërtetës, për të mbrojtur të ardhmen demokratike të Kosovës.