Ramush Haradinaj, kryetar i Aleancës për Ardhmërinë e Kosovës (AAK), ka reaguar në profilin e tij në Facebook lidhur me rinumërimin e pjesshëm të votave të kandidatëve në zgjedhjet e 28 dhjetorit në Kosovë.
Sipas tij, ky proces ka nxjerrë në pah një skemë manipulimi me përmasa shqetësuese ndaj votës së qytetarëve. Haradinaj vlerëson se integriteti i zgjedhjeve është cenuar dhe se votat duhet të rinumërohen një për një në të gjithë Kosovën.
"Procesi i këtyre zgjedhjeve qysh sot është lënduar dhe pas këtyre gjetjeve, vota duhet të rinumërohet një për një. Pa rinumërim të tërësishëm, nuk sigurohet integriteti i këtyre zgjedhjeve", ka shkruar ai.
Haradinaj ka shprehur habi për mungesën e reagimit të Prokurorisë. "E habitshme qysh Prokuroria nuk është vënë në lëvizje qysh sot. Demokracia nuk mund të jetë viktimë e një grushti hajdutësh", thekson ai.
Ai ka apeluar te të gjithë mekanizmat institucionalë që, me vendime dhe veprime konkrete, të mbrojnë votën e qytetarëve dhe të rikthejnë integritetin e zgjedhjeve. "Çdo drejtim tjetër do të kishte pasoja të pariparueshme", paralajmëron Haradinaj.
Sipas të dhënave të deritanishme, janë rinumëruar 445 nga 914 vendvotime, ku janë hasur mospërputhje në vota.