Fundjava e muajit gusht ka sjellë një fluks të lartë automjetesh në bregdetin e Shëngjinit, duke shkaktuar paralizë të qarkullimit në zonën e Ranës së Hedhun. Dalja masive e pushuesve pas mbylljes së ditës në plazh ka krijuar kolona kilometrike që zgjaten përgjatë gjithë aksit rrugor deri në nyjen e Lezhë-Milot.
Sipas raportimeve nga terreni, qytetarët kanë mbetur të bllokuar në automjetet e tyre për rreth dy orë, pa mundësi lëvizjeje normale. Kjo situatë paraqitet tepër problematike për familjarët që po udhëtojnë me fëmijë të vegjël, të cilët janë të detyruar të qëndrojnë në makina për orë të tëra nën temperaturat e larta. Autoritetet lokale ende nuk kanë njoftuar për ndonjë masë lehtësuese për zhbllokimin e këtij aksi tejet të ngarkuar nga lëvizja e mjeteve turistike.