Një ngjarje e rëndë ka ndodhur të dielën në mbrëmje në qytetin Billings të shtetit Montana, ku disa persona kanë humbur jetën pas një incidenti me armë zjarri dhe zjarr në një banesë. Policia e ka cilësuar ngjarjen si një konflikt familjar.
Sherifi i përkohshëm i Qarkut Yellowstone, Kent O’Donnell, deklaroi se viktimat janë identifikuar, por numri i saktë, emrat dhe moshat e tyre nuk janë bërë ende publike për shkak të fazës hetimore. Sipas autoriteteve, autori i ngjarjes dyshohet se i ka vënë flakën ndërtesës pas të shtënave dhe më pas ka vrarë veten me armë zjarri. Një fushatë mbledhjeje fondesh në platformën GoFundMe ka pretenduar se nga kjo tragjedi kanë humbur jetën të paktën tetë persona, përfshirë dy fëmijë, shifër që ende nuk është konfirmuar zyrtarisht nga autoritetet vendore.
Policia u njoftua përmes një telefonate në numrin 911 rreth orës 18:01, ku dëgjoheshin të shtëna. Oficerët mbërritën në vendngjarje në White Star Circle rreth 10 minuta më vonë, ku dëgjuan të shtëna nga pjesa e pasme e banesës, ndërsa pak minuta më pas ndërtesa u përfshi plotësisht nga flakët.
Ndërhyrja e zjarrfikësve u vështirësua për shkak të qasjes së kufizuar në ujë dhe mungesës së hidrantëve të mjaftueshëm në zonë. Shefi i zjarrfikësve të Billings, Matt Hoppel, deklaroi se përkeqësimi i kushteve të zjarrit bëri që banorët të mos kishin mundësi shpëtimi. Aktualisht, autoritetet po vijojnë hetimet për zbardhjen e rrethanave, motivit të sulmit dhe shkakut të saktë të zjarrit.
Përditësime
Sherifi i qarkut Yellowstone, Kent O’Donnell, konfirmoi zyrtarisht se midis viktimave në banesën pranë zonës Uest End të Billings ndodhen si të rritur ashtu edhe të mitur. Autoritetet kanë përfunduar identifikimin e trupave, por po mbajnë të fshehtë identitetin e tyre deri në njoftimin e familjarëve. Sherifi O’Donnell shpjegoi se hetuesit po përballen me vështirësi në mbledhjen e provave forenzike, pasi sasia e madhe e ujit të përdorur nga zjarrfikësit për të shuar flakët ka dëmtuar integritetin e vendngjarjes.