Ngjarja e rëndë ndodhi të hënën në qytetin Muscatine të shtetit Iowa, në SHBA. Autoritetet u njoftuan për të shtëna me armë zjarri pak pas orës 12:00. Policia gjeti fillimisht katër viktima pa shenja jete brenda një banese.
I dyshuari, 52-vjeçari Ryan Willis McFarland, ishte larguar nga vendngjarja përpara mbërritjes së forcave të rendit, por u lokalizua pak më vonë pranë një shtegu në lumin Misisipi. Sipas shefit të policisë, Anthony Kies, autori i dha fund jetës me armë zjarri në momentin që oficerët po përballeshin me të. Pavarësisht ndihmës së parë të dhënë, ai u shpall i vdekur në vendngjarje.
Pas kontrolleve të mëtejshme, hetuesit zbuluan edhe dy viktima të tjera: një burrë në një banesë tjetër dhe një tjetër në ambientet e një biznesi lokal. Autoritetet sqaruan se gjetjet paraprake tregojnë se ngjarja buron nga një konflikt familjar dhe se të gjashtë viktimat janë anëtarë të familjes së autorit.
Policia konfirmoi se McFarland kishte precedentë penalë të mëparshëm, ndonëse detaje shtesë mbi historikun e tij nuk janë bërë publike. Identiteti dhe moshat e viktimave mbeten ende të panjohura për publikun. Shefi i policisë, Kies, e cilësoi ngjarjen si një akt të lig, ndërsa theksoi se nuk ka kërcënim tjetër për komunitetin.