Një ngjarje e rëndë ka ndodhur në Pieve di Camaiore, në provincën e Lucca-s, Itali, ku një 63-vjeçar ka vrarë me armë gjahu bashkëshorten 52-vjeçare dhe djalin 24-vjeçar brenda banesës së familjes.
Alarmi është dhënë nga fqinjët, të cilët kanë njoftuar menjëherë autoritetet. Në vendngjarje kanë mbërritur forcat e policisë dhe karabinierët, të cilët kanë bërë të mundur ndalimin e autorit. Pavarësisht ndërhyrjes së shpejtë të ekipeve të emergjencës mjekësore 118 dhe helikopterit të shpëtimit, për viktimat nuk ka pasur asnjë mundësi mbijetese.
Banorët e zonës kanë raportuar për mosmarrëveshje dhe tensione të mbartura prej kohësh brenda kësaj familjeje, ndonëse nuk pritej një epilog i tillë tragjik. Autoritetet italiane kanë nisur një hetim për të zbardhur rrethanat dhe motivet e plota të ngjarjes.