Një ngjarje tragjike është shënuar në fshatin Fermë-Çlirim të Fierit, ku 74-vjeçari Flamur Braçe ka humbur jetën pasi banesa e tij u përfshi nga flakët. I moshuari, i cili për shkak të gjendjes së tij shëndetësore ishte i paralizuar, jetonte i vetëm në banesën ku ndodhi fatkeqësia. Fillimisht u raportua se viktima ishte 70 vjeç, por verifikimet e mëvonshme konfirmuan se ai ishte 74 vjeç.
Sipas informacioneve të përcjella nga Policia e Shtetit, dyshohet se shkaku i rënies së zjarrit ka qenë një shkëndijë elektrike. Flakët janë përhapur me shpejtësi duke përfshirë pjesën më të madhe të banesës, përfshirë edhe çatinë. Si pasojë e intensitetit të zjarrit, çatia është shembur duke rënë mbi Flamur Braçen, çka ka rezultuar fatale për jetën e tij.
Në vendin e ngjarjes kanë mbërritur shërbimet e zjarrfikësve, me tre automjete që janë angazhuar për shuarjen e flakëve dhe ndërhyrjen e emergjencës. Efektivët e Policisë së Shtetit ndodhen gjithashtu në vendngjarje dhe po kryejnë veprimet hetimore për zbardhjen e plotë të rrethanave të ngjarjes dhe konfirmimin përfundimtar të shkaqeve që çuan në këtë tragjedi.
Përditësime
Burimet konfirmuan se viktima ishte 74 vjeç, ndërsa në operacionin e shuarjes së zjarrit morën pjesë tre automjete zjarrfikëse.
Policia identifikoi viktimën e zjarrit në Fier si 70-vjeçarin Flamur Braçe.