Një ngjarje tragjike ka ndodhur në jug të Nigerisë, ku të paktën 37 persona kanë humbur jetën pasi janë ekspozuar ndaj gazrave toksikë. Incidenti u regjistrua në Okrika, pranë qytetit Port Harcourt në shtetin Rivers.
Sipas informacioneve të bëra publike nga organizata joqeveritare Qendra e Veprimit për të Rinjtë dhe Mjedisin (YEAC-Nigeria), tragjedia ndodhi kur një grup të rinjsh u përpoqën të lidhnin një tub me linjën e transportit që dërgonte produkte nafte nga uzina Indorama Eleme Petrochemical drejt anijeve për eksport. Gjatë kësaj ndërhyrjeje të paligjshme, personat u vunë në kontakt me sasi të larta gazi toksik, çka solli pasojat fatale.
Organizata YEAC-Nigeria ka njoftuar se operacionet e kërkim-shpëtimit për personat e zhdukur vijojnë ende. Po ashtu, raportohet se disa trupa janë parë duke lundruar në ujërat e lumit në zonën përreth, por ende nuk janë nxjerrë nga autoritetet.
Policia e shtetit Rivers ka konfirmuar se incidenti ka ndodhur dhe se autoritetet kanë nisur hetimet për të zbardhur rrethanat e plota, ndërkohë që kërkimet vazhdojnë. Megjithatë, policia ende nuk e ka konfirmuar zyrtarisht bilancin e viktimave të raportuar nga organizata joqeveritare. Vjedhja e naftës dhe sabotimi i tubacioneve në Deltën e Nigerit mbetet një sfidë e vazhdueshme, duke shkaktuar shpesh rreziqe për jetën dhe ndotje të rëndë mjedisore në këtë rajon naftëmbajtës.
Përditësime
Më shumë se 100 persona ndodheshin në zonë me barka të vogla në momentin e incidentit, raporton BBC. Disa prej viktimave kanë rënë në lumin Bonny gjatë përpjekjes për t'u larguar nga zona e kontaminuar. Ekipet e shpëtimit dërguan në spital një numër të pacaktuar personash që kishin humbur vetëdijen për shkak të gazit toksik.